Официјално отворање на Магна Мехатроникс во Штип: нови напредни технологии, иновации и висока додадена вредност во економијата
Денес со официјално отворање на новата фабрика на Магна Мехатроникс во ТИРЗ Штип, Македонија доби уште една значајна инвестиција со висока додадена вредност, која значајно ќе придонесе за севкупниот економски раст и развојот на напредни технологии. Директорот Димовски, заедно со премиерот Христијан Мицкоски присуствуваше на настанот каде истакна дека отворањето на фабриката е резултат на континуираните напори за создавање поволна бизнис-клима и привлекување високо-технолошки инвестиции.
Премиерот Христијан Мицкоски во своето обраќање нагласи дека инвестицијата на Магна Мехатроникс ќе биде силен акцелератор на економскиот развој и позитивните промени во нашата држава.
„Оваа инвестиција не е само капитален проект, туку вистинска приказна за доверба, партнерство и заедничка визија. Се простира на 18.000 метри квадратни, за што ќе бидат инвестирани околу 40 милиони евра и од презентацијата на претходните говорници можеме да заклучиме дека ќе бидат вработени во самиот пик на инвестицијата повеќе од 600тина лица.“ – кажа Мицкоски
Директорот на ТИРЗ, Гоце Димовски кажа дека со отворањето на оваа фабрика, освен што ќе отвори нови работни места, ќе ја зајакне и конкурентноста на нашата држава како локација за нови странски директни инвестиции.
„Изминатите 9 месеци, заедно со Владата напорно работевме на создавање уште поатрактивна, поодржлива и поконкурентна средина за странските инвеститори, а моментално работиме и на одредена регулатива, сѐ со една цел, а тоа е Македонија да се усогласи со глобалните трендови кои се случуваат во делот на привлекување странски директни инвестиции.“ – изјави Димовски.
Претседателот на Магна Мехатроникс Мирорс и Лајтинг Џеф Хант најави дека фокусот ќе биде на производство на бројни мехатронички производи што овозможуваат иновативен пристап за клиентите и подобро искуство во возењето.
„Како лидери на пазарот на мехатрониката возбудени сме што можеме да продолжиме со развојот на овие проиозводи и тоа ќе го правиме на успешниот темел што веќе го поставивме тука во Северна Македонија“ – изјави Хан.
Уве Гајсингер, претседател на Магна Европа, нагласи дека со оваа инвестиција го препознаваат огромниот потенцијал на овој регион.
„Со обезбедување локации ширум континетот се позиционираме подобро да ги опслужуваме нашите клиенти, да одговориме на барањата на пазарот и да стимулираме иновации во автомобилската индустрија. Новата фабрика е показател за нашата верба во моќта на соработката, силата на локалните талентирани луѓе и во важноста на одржливиот развој“ рече Гајсингер.
Генералниот директор на Магна Мехатроникс Штип, Горан Деспиноски посочи дека ТИРЗ Штип е одбрана за локација за инвестирање по позитивните искуства од нивната фабрика во Струга, каде имаат 1000 вработени и инвестиција од 30 милиони евра, како и добрата инфаструктурата, добрите цени на комуналии, квалификуваната работна сила и поддршката од Владата.
„Оваа година ќе ја завршиме со 350 вработени, 2026. со 440, а потоа од 2027 година над 600“, рече Деспиноски.