Drejtori Goce Dimovski ligjërues në Kursin e 53-të Rajonal në UNKTAD
Në kuadër të Kursit të 53-të Rajonal të Fakultetit Ekonomik – Shkup dhe UNKTAD-it, kushtuar aspekteve kryesore të agjendës ekonomike ndërkombëtare, drejtori Goce Dimovski sot mbajti një ligjëratë me temën “Attracting FDI strategically – the case of North Macedonia” para një numri të madh përfaqësuesish të administratës publike nga vendet e rajonit të Evropës Lindore.
Në prezantimin e tij, Dimovski paraqiti përvojën e Maqedonisë në tërheqjen e investimeve të huaja, rolin e ZZHTI në krijimin e një mjedisi konkurrues dhe të parashikueshëm biznesi, si dhe mekanizmat e mbështetjes institucionale që u ofrohen investitorëve në të gjitha fazat e realizimit të projekteve të tyre. Theks i veçantë iu kushtua trendeve bashkëkohore në rrjedhat globale të investimeve, sfidave në kushtet e ndryshimeve, si dhe nevojës për politika të qëndrueshme që do të kontribuojnë në tërheqjen e investimeve me vlerë të shtuar më të lartë, teknologji të reja dhe vende cilësore pune. Në kuadër të ligjëratës u zhvillua një diskutim konstruktiv me pjesëmarrësit, gjatë të cilit u shkëmbyen përvoja dhe qëndrime mbi politikat për tërheqjen e investimeve, rolin e institucioneve në përmirësimin e klimës së biznesit dhe mundësitë për avancimin e bashkëpunimit rajonal në fushën e zhvillimit ekonomik.
Me pjesëmarrjen e drejtorit Dimovski si ligjërues, Drejtoria për ZZHTI edhe një herë konfirmon përkushtimin e saj për ndarjen e përvojave dhe praktikave të mira në fushën e tërheqjes së investimeve të huaja direkte, si dhe për forcimin e bashkëpunimit me komunitetin akademik dhe organizatat ndërkombëtare. Ngjarje të tilla përbëjnë një mundësi të rëndësishme për shkëmbimin e njohurive dhe kontribuojnë në avancimin e bashkëpunimit me rajonin dhe më gjerë.
