Kompani sllovene me një investim të ri potencial me vlerë minimale prej 15 milionë eurosh në ZZHTI
Drejtori Goce Dimovski zhvilloi sot një takim me INEA, një kompani sllovene e inxhinierisë dhe teknologjisë me seli në Lubjanë. Gjatë takimit u shqyrtuan mundësitë që ofrojnë Zonat e Zhvillimit Teknologjik-Industrial (ZZHTI), si dhe aktivitetet dhe planet e kompanisë për një investim të ri potencial me vlerë minimale prej 15 milionë eurosh, që do të hapte të paktën 100 vende të reja pune.
Drejtori Dimovski prezantoi përfitimet që Drejtoria e ZZHTI-së, në bashkëpunim me Qeverinë, u ofron investitorëve të huaj. Ai theksoi pozitën strategjike të vendit, infrastrukturën moderne, fuqinë punëtore të kualifikuar dhe paketën e masave shtetërore për mbështetjen e investimeve. Gjithashtu, ai nënvizoi se Drejtoria e ZZHTI-së është një partner i qëndrueshëm për të gjithë investitorët gjatë gjithë procesit investues, duke ofruar mbështetje të vazhdueshme institucionale, nga bisedimet fillestare deri te realizimi dhe zhvillimi i mëtejshëm i investimit.
Nga ana e Alesandro Lupis, drejtor i përgjithshëm i kompanisë, u shpreh kënaqësia për takimin e zhvilluar, me pritshmëri për vazhdimin e komunikimit dhe shqyrtimin e mëtejshëm të mundësive për realizimin e një investimi potencial në kuadër të zonave ZZHTI. Ai prezantoi projektet dhe aktivitetet aktuale, si dhe përvojën shumëvjeçare të kompanisë në zhvillimin dhe zbatimin e zgjidhjeve moderne inxhinierike për sektorin industrial.
INEA është një kompani e specializuar në automatizimin industrial, digjitalizimin e proceseve të prodhimit, robotikë dhe menaxhimin e energjisë. Me zgjidhjet e saj, ajo ndihmon kompanitë të rrisin efikasitetin, produktivitetin dhe konkurrueshmërinë. Kompania ka realizuar projekte të shumta në nivel ndërkombëtar dhe përfaqëson një shembull të zhvillimit të teknologjisë së lartë dhe inovacionit.
Me më shumë se 35 vjet përvojë dhe mbi 3.000 projekte të realizuara në më shumë se 30 vende, INEA njihet si një partner i besueshëm për zhvillimin dhe zbatimin e zgjidhjeve moderne në automatizimin industrial, digjitalizimin dhe menaxhimin e energjisë. Kompania bashkëpunon me kompani globale lider të teknologjisë, si AVEVA, Siemens, Rockwell Automation dhe Dassault Systèmes, duke kontribuar në përmirësimin e proceseve të prodhimit dhe futjen e teknologjive inovative.
